香港原來有一個物業管理業監管局（簡稱物管局），負責監管物業管理行業。近十年來，香港不斷出現甚麼監管局，例如保險、地產代理、旅遊、一手樓銷售等乜局物局，除咗主席及董事會成員係「無糧公職」人士之外，每個局都有行政總裁及一班管理人員，全部由納稅人出糧，咁多個局究竟做乜冬冬呀，就係發牌、監察、處理市民投訴之類，究竟呢啲局為廣大市民帶來甚麼好處，公帑是否用得物有所值，根本冇人去研究過，好多人，特別係尊貴的議員，最鍾意批評一啲商業行為「冇王管」，其實「有王管」又怎麼樣，真係帶來利益大過所花的成本？木宰羊。
物管局主席係謝偉銓，副主席係王國興，兩位都係2016年選舉失敗嘅立法會議員。做建制派議員有個好處就係輸咗選舉就會攞番個安慰獎，甚至大獎㖭，睇吓民政事務局局長劉江華就知道，2012年有泛民選民熱烈地彈琴，熱烈地唱，慶祝劉江華在新界東落選。嘻嘻，今天日日自己熱烈地彈琴、熱烈地唱，飲番一杯慶祝嘅，可能就係劉江華局長，做咗局長，薪高糧準，到處受社團逢迎，街坊會視之為父母官，幾威風呀，一切全靠當年落選之嘛。
物管局管物業管理，淺陋無知嘅左丁山以為佢嘅上級機關係運房局，由陳帆指揮，點知唔係，一位物業管理經理話俾左丁山聽：「我都唔明白，物管局係屬於民政事務局範圍，劉江華局長有say㗎。」怪不得啦，謝偉銓係測量師，對物業有認識，由佢做主席，算了罷，但副主席係王國興，係邊科專家呀？我地對佢認識比較多嘅恐怕就係工聯會頭號打手，以前在立法會專門反拉布，專門與黃毓民、梁國雄對着幹，作文字口號之爭，除此之外，佢有過甚麼政績及對物業管理有甚麼認識呢？又係木宰羊。物業管理朋友倒也心水清，驚左丁山唔明，畫公仔畫出腸：「哎吔，人地要票呀，要建立票倉基礎呀，劉局長與王前議員根本係同路人。」呢位朋友又話，在物管局出現前後一段時間，忽然湧現幾個物業管理乜會物會，爭取代表資格加入物管局，反而歷史比較耐嘅香港物業管理人員組織，即香港房屋管理學會就被摒諸門外，冇代表坐在物管局。唉，左丁山在本欄講過好多次政府唔會直接干預甚麼「機構獨立運作嘅」，委任甚麼人入呢啲機構先至係要害呢！