工聯會離島區議員鄧家彪，盛傳會代表建制派出戰稍後舉行嘅新東補選。唔通戰意太旺盛，惹火上身？阿彪位於東涌逸東邨勤逸樓地下嘅議辦噚日被人縱火。
昨日中午約3點15分，有屋邨保安發現該辦公處門前有火種，立刻報警，消防到場灌救，約10多分鐘救熄火種，掛喺門口嘅膠簾燒爛咗，鐵閘亦有熏黑痕迹。消防經調查後認為火警有可疑，警方列縱火處理。阿彪事後翻睇CCTV，發現一名紮馬尾、着白恤衫牛仔褲嘅女子事前喺議辦外徘徊2、3分鐘，之後到附近涼亭摷咗兩袋垃圾喺議辦門口，再撕海報用打火機點火，佢話好在噚日周日冇職員開工，又閂門閂閘，否則後果不堪設想。噚晚警方拉咗一個泰國裔女子，仲發現佢同另一單逸東邨縱火案有關，將合併調查。