只要選舉殺到，一切解釋唔到嘅事都可以發生，好似新民黨葉劉淑儀嘅橫額都會俾人𠝹爛一樣。葉劉噚日喺facebook話，佢喺中環會德豐大廈對面嘅橫額，俾一批巴基斯坦籍人士破壞，正好警員經過，將涉事破壞者帶返警署落案。多年來民主派議員嘅橫額俾人𠝹到「刀削面」咁款，點解警方都係未能緝兇呢？
葉劉話，近日佢嘅fb出現咗好多負面留言，好似鬧佢係「黃屍」（撐警嘅葉劉點解唔係藍絲？）、「掃帚頭」，令佢覺得好可疑，「凡此種種，不知是否與我近日表示，會考慮參加山頂區區議會補選有關呢？」葉劉又話，自己一直同在港嘅巴基斯坦人關係良好，經常參加巴基斯坦社群好似婦女會等嘅活動，所以佢相信今次事件並非出自涉事者嘅本意，而係俾人教唆指使，蓄意破壞。