大家記得財政司司長陳茂波早年接受訪問，曾自爆年幼時因家貧受唔住引誘，為一毫子為人帶白粉，不過好彩後來冇誤入歧途，但究竟邊個扶波波行番條正路？佢噚日發表網誌，就透露咗一啲端倪。
波波喺網誌話，上周佢探訪香港青少年服務處心弦成長中心，同成功戒毒嘅青少年及協助佢哋嘅社工見面，波波話從每個青年嘅感言入面，感受到社工對佢哋影響深刻，甚至好似至親家人咁，幫助呢班青少年重新出發。
波波話佢都非常感恩細個時得到社工幫助，不致令佢誤入歧途，又話社工幫助有需要嘅人，改變呢啲人嘅人生，𠵱家回想自己喺複雜環境長大，仲係萬般滋味湧上心頭，所以希望努力做好工作，幫社會被遺忘嘅青少年實現理想。照呢篇網誌睇，當日應該有位社工帶番佢入正途。