平日清晨5點半就起身、出名係工作狂嘅政務司司長張建宗，近日出廣告請大內總管，睇住自己個政務司司長官邸，職銜叫做「總管事」，月薪28,000蚊。
呢位大內總管要提供家居服務，包括清潔打掃、洗燙、宴會烹調同備席、招待酒會賓客等，並需要督導家傭工作同編定值勤表，以及安排保養、維修、更換家居物品同陳設。
呢個職位喺學歷上冇乜太高要求，能操流利粵語、簡單英語同普通話，能閱讀同書寫中文同簡單英文就得。不過，最重要應該係工作經驗，小肥張喺招聘廣告話，應徵者要喺家居服務、大戶家庭、大型機構招待賓客方面，具備最少9年工作經驗。