雷神到底係雷神！雖於對上三個本地賽日加埋之前兩日（9月29及30日）遠征澳洲，莫雷拉只係贏過一場賽事咁大把，但係只要有貨喺手，贏馬對佢嚟講唔會係難事。
結果跑到今午（1日）沙田第四場四班1400米，雷神終憑蘇偉賢馬房「喜得福」重響勝鼓，從中亦達至個人在港600Win新里程，這匹大熱門單Win及組合獨贏A1分別派20.5及17.5元。
6歲澳洲自購馬「喜得福」上仗季內初出，負131磅跑同班同程1400米不敵「紅衣優駿」做阿二，今次孭至133頂磅，惟對手顯著減弱，沿途守三四位，直路加速透出未受威脅，拋離兩馬位，順利補中打開馬兒新季勝門，亦成為繼同主「同得福」兩戰不敗後，雷神今季為「得福」系馬主易劉瑛琳與易國良所贏的第三場頭馬。
第四場開出熱頭冷腳，亞軍由全場最老的九歲馬「勝利之星」夥拍梁家俊影贏韋達座騎「魅力知寶」取得，「魅力知寶」閘前落飛只跑第三；第四名為初出冷馬「繽紛駿驥」，四重彩派一萬一千幾。