立法會議員、熱血公民主席鄭松泰之前因倒插國旗同區旗，被控侮辱國旗區旗罪成。當日裁判官話，就算只係倒插國旗同區旗，都破壞咗國旗、區旗尊嚴，已構成「玷污」控罪嘅元素，當時好多網民已經開火，話次次愛國愛港團體搞遊行集會，完咗之後將國旗同區旗亂丟，有時仲隨手掉落地或塞入垃圾桶，咁係咪都叫「玷污」國旗同區旗先？係咪要檢控呢？
唔知係咪因為法庭有咁嘅裁決，啲愛國愛港團體怕中招犯法，噚日好多團體搞十．一活動，都會收番用過嘅國旗同區旗，好似北區各界噚日搞十．一嘉年華，參加市民都有拎國旗區旗揮動，不過今次佢哋相當自律，用完後一係帶走、一係交畀大會，只係有一支半支喺地下，冇再好似之前國旗、區旗塞滿垃圾桶嘅情況。