聽日就係迎月日，中秋呢個咁人月兩團圓嘅日子，基斯坦奴朗拿度（C朗）都啱玩？C朗咁多年嚟都出名孝順，上個禮拜六佢就post咗自己、過咗身嘅老竇Aveiro同埋三個囝囝嘅三代同堂合照，留言就話：「你永遠會喺我哋心中。」睇嚟C朗想從小就教三個仔咩叫孝道啵！而且，同日C朗ig都有條大仔小C朗嘅射波片，而且C朗仲幫乖仔綁鞋帶，認真溫馨。
懷念亡父念舊情
網民成日笑C朗係「慈善球王」，佢好波啲定美斯好波啲就冇人有答案嘞，不過C朗咁多年嚟都出晒名孝順就肯定堅嘅！由代母所生嘅三個C朗愛子，雖然有兩個仲係手抱BB，不過C朗都想灌輸呢個優質觀念過佢哋，大大張爸爸肖像嘅油畫擺喺屋企，而且C朗拉埋三個仔合照，組成一幅另類全家福，而且仲話：「你永遠留喺我哋心中。」
早喺C朗20歲嗰陣，C朗爸Aveiro就因為肝病過身，所以C朗從此戒酒戒蒲，都係佢之後成就到咁輝煌職業生涯嘅一大轉捩點，唔係嘅話，C朗都隨時變咗「月巴」！另外一樣關佢爸爸事嘅，可以話係雲尼斯達萊呀！事關當年C朗仲踢緊曼聯，雲佬就話C朗既然老竇走咗，叫佢改認同樣係葡萄牙籍、當時做緊曼聯助教嘅基羅斯做老竇咁話。涼薄成咁，所以嗰季之後費格遜就將雲佬賣咗去皇馬。另外，雖然C朗已經離開咗曼聯好多年，但仲好尊重同佢情同父子嘅費爵爺，連歐聯決賽捧完盃後，都要特登去攬攬恩師，可見C朗的確係個好重情嘅人。
幫小C朗綁鞋帶好warm
同時，C朗都好錫自己個仔嘅，成日都拍低小C朗踢波嘅片，仲好似一般家長咁，見到阿仔射得靚會大聲喝彩。今次條片C朗仲屈膝幫乖仔綁好對boot，再自己做埋示範教射波！七歲嘅小C朗射波就當然冇老竇咁腳腳七注啦，不過都有料到㗎，等到遲啲C朗對孖B都大個，四仔爺一齊踢波嘅畫面，都應該係另類放閃呀！
雖然講到子承父業就好似太遙不可及，不過喺人月兩團圓嘅佳節，不妨多一啲幻想吖！而且，C朗女友佐珍娜家陣都陀住佢嘅骨肉，雖然係仔定女就未知，不過以C朗嘅凌厲生產力，加上搵代母嘅號召力，隨時組隊C朗子嗣足球隊都得呀！
