噚日十．一升旗禮喺灣仔金紫荊廣場舉行，亦係特首林鄭月娥上任之後主持嘅第一次十．一升旗儀式，當然呢啲官方場合，「第一先生」林兆波亦要陪同出席。雖然林生一如以往出席官方場合，都好低調咁陪住太太，但佢再着白襪仔現身，仍然引起唔少網民留意。
林兆波着白襪仔唔係第一次，之前林鄭主持7.1升旗禮，已經有人留意到佢着白襪仔，引起好多網民議論，不過似乎林生冇乜理外面點睇，繼續我行我素。其實林生唔止對個人衣着有所堅持，佢對做一個低調嘅第一先生亦好堅持，好似噚日十．一酒會，一大班人圍住林鄭影相，以往有嘉賓會搵埋特首另一半一齊影，但八方噚日就唔多覺眼林生喺林鄭附近，又或有人搵到佢兩夫婦合照，八方估林生未必想咁高調，可能一完咗儀式已經走人。