跑盃賽尤其係分級賽，基本上冇練馬師大摩唔成事。
今午（1日）第七場舉行季內首場分級賽，即1000米直路三級賽國慶盃，大摩以「飛來猛」及「新力風」囊括130倍大冷啡燈Ｑ，盡顯盃王本色。其中「飛來猛」在華將何澤堯胯下後上爆25倍冷Win捧盃，組合獨贏3揀1開A3派33元，勝出練馬師開B2派41元。
上屆國慶盃大摩單刀赴會以「新力風」跑第五，今年佢兵分三路，除有「飛來猛」及「新力風」包辦前兩名外，還有「駿皇綵」跑第四，幾乎囊括三重彩創造一時佳話。
其中「飛來猛」過去7捷全是1400米，今仗初跑1000米直路賽，原來一樣咁勁，沿途居中，直路馬群中殺上突圍贏頸位，取得服役第八Win。
大摩捧盃包Q開心外，落飛黨呢場亦豐收，事關「飛來猛」搭「新力風」開出130倍啡燈Ｑ，單是這條Ｑ落飛黨已大幅獲利約1,500萬元。
今場二至四名順序「新力風」、「翩翩」及「駿皇綵」，四重彩派六萬一千幾。全港最高分馬之一蔡約翰馬房「紅衣醒神」（128分），在雷神莫雷拉胯下4.1倍只跑第六，其廐侶蔡約翰另一駒「華恩庭」則衛冕失敗跑第八。