民建聯蕭嘉怡走咗去做政務司司長政治助理，佢留低嘅中西區區議會東華選區議席，政府公佈咗會喺今個月3號開始接受提名。之前八方講過，中西區規劃及保育街坊聯盟想推羅雅寧出選，但民主黨又決定支持小花伍凱欣去馬，聽聞雙方協調到𠵱家都冇結果，兩人更有可能一齊喺聽日報名參選。
據聞之前聯盟搵民主黨傾過，但之後再冇新進展，而伍凱欣近日好落力落區擺街站，地區人士相信喺呢個情況下，伍凱欣似乎去馬意志堅決，肯讓路機會相當低；而羅雅寧上星期亦同聯盟顧問姚松炎落區見街坊，地區人士話羅雅寧認為自己勝算會比伍凱欣高，讓路可能性唔高。有傳羅雅寧會喺聽日報名參選，據聞伍凱欣亦有可能喺聽日報名，如果民主派真係有兩個人選，最後咪又益咗建制派！