列根號前日招待傳媒參觀，《蘋果》都有份上去睇吓呢隻美國海軍航母嘅風采，原來美軍都有邀請部份立法會議員上艦參觀，包括公民黨飛機師議員譚文豪，作為飛機迷嘅譚文豪喺fb話，今次參觀令佢興奮到成晚瞓唔着，仲要跪求太太畀佢去。
譚文豪話上去列根號參觀前一晚，已經興奮到成晚瞓唔着，而美軍安排佢坐C-2A Greyhound灰狗運輸機上艦，仲可以喺列根號上面近距離目睹F18大黃蜂、超級大黃蜂同埋鷹眼預警機升降，最後仲可以坐飛機以彈射方式離開列根號，令佢呢個飛機迷樂而忘返，難怪佢要加一句「我真係好鍾意飛機㗎！」之後再加一堆hashtag，好似#噚日跪求譚太比我去、#航空母艦上面原來有五千人、#每日伙食費要十萬零五千美金、#食都食窮你等等，睇嚟佢真係好興奮。