仲有一個星期，《王者對決3》會喺灣仔會展8,000人場舉行，重頭戲由香港不敗拳王曹星如對日籍前WBA超蠅量級世界拳王河野公平，大家等了又等，終於本月七號上演，賽事推廣公司DEF Promotions安排今日下晝12點喺上環DEF Boxing Gym公開訓練，五名旗下拳手包括星如、師弟潘啟情、二胡小師妹林海明（Sandy）、湯拖及香港土生土長尼泊爾拳手尼保斯嘉爾會展示訓練成果，本報會以fb直播現場情況。
大家最關心係爭取職業生涯22連勝嘅星如，佢自八月中出席賽事記者會後，一直專心訓練，推咗所有贊助活動同傳媒訪問，一心以最佳狀態示人，七號呢一仗亦係佢踏入30歲嘅第一場比賽。今日出席公開訓練嘅五名拳手，都會亮相《王者對決3》，今日出場次序先後係尼保斯嘉爾、湯拖、Sandy、潘啟情，星如就壓軸出場，各人會進行四個回合嘅練習，之後接受傳媒採訪。星如今次選擇留港備戰，主要因為DEF有完善支援，除星如專任拳擊教練Jake外，仲有體適能練習、物理治療等輔助，正如星如話齋，年紀漸長後，恢復部份更重要。