【《蘋果》專訪】
現年35歲的黃心穎家姐黃心美，06年由加拿大回流返港簽約做歌手，但歌手夢碎轉戰台灣，當時和圈外男友Thomas結婚，但婚姻維持不到5年，失婚後返港加入Now TV工作，現為ViuTV台柱。回復單身後的心美，事業越趨順利，更被網民捧為「宅男女神」、「娘娘」。
心美日前在天后接受本報訪問，大談封號，她笑說：「呢啲只不過係虛名，女乜鬼神呀！我唔需要呢啲咁嘅名，有人記得我個名已經好開心，嗰啲一姐、女神朵，可以唔使，但係我控制唔到人哋咁講。」
「總有我市場」
已走出失婚陰霾，但心美承認在愛情路上愛犯賤，她說：「離婚之後都有拍拖，唯一唔同係，我以前係外貌協會，但呢個男友冇樣睇，對你好到唔知點形容，最後拍咗個幾月分手，我覺得自己好犯賤，佢對我太好，好到頂唔順，所以都係做番以前犯賤嗰條路！」問到性格太強會否嚇走追求者？她說：「好多男人鍾意man啲嘅女仔，我總有我嘅市場，我唔鍾意俾男人追，見到啱我會自己追，最好係一見鍾情嗰種，第一眼會見到啱唔啱自己，當然唔鍾意會落閘，無謂浪費時間。」
上天會安排
於剛播出的ViuTV真人騷《暗中旅行2》，心美和視障人士李軒及其未婚妻Umi去日本，心美更充當攝影師為一對新人影婚紗相。其間，她未有因自己離婚而傷感，她說：「要喊嘅話，嗰次去台北拍外景，咁橋喺前夫住嘅附近，真係好感觸，我約咗佢嘅爹哋媽咪見面，我哋食完餐飯，臨走嗰陣攬咗一下，上到車我喊到癲咗，流咗唔知幾多公升眼淚。我𠵱家對將來都有期望，但係未必好似以前咁瞓身，好多嘢唔可以強求，當你越唔強求，上天總係會安排畀你。」
採訪：何慧斯
攝影：沈健程
場地提供：浜滝Hamataki