哈利卡尼又省兩粒！熱刺上周六晚英超作客4:0炒哈特斯菲爾德，踏入九月全面着火嘅卡尼，喺最後一戰都用左、右腳各入一球，連埋國家隊賽事單月入成13粒，帶領熱刺今季英超四場作客全勝！
卡尼喺10分鐘首先把握哈軍後防基斯路維解圍失誤單刀，加上龍門祖拿斯盧素嘅封位漏咗條近柱，所以卡尼好輕鬆右腳抽入得米；去到23分鐘，卡尼再嚟個人表演，禁區頂一個轉身就撇甩兩個守衞，喺禁區頂左腳射出一條靚到絕嘅弧線得手，九月累積球會同國際賽已經入咗13球，刷新個人單月新高，加上隊友賓戴維斯入一球同穆沙施素高埋齋，熱刺輕鬆大炒一場，今季四場作客聯賽全部贏晒。
不過，收夠籌嘅熱刺下半場明顯放慢進攻節奏，所以卡尼冇機會繼上周中歐聯之後，連續兩場「戴帽」嘞！