昂坪360喺6月換纜後，旅客人流未如理想，所以佢哋趁十．一黃金周，再度請嚟少林武僧表演十八般武藝，希望入秋後為昂坪360撐場吸引遊客。
噚日昂坪360安排13名少林弟子亮相，除咗即場表演舞紅旗陣、叠羅漢、樸刀破槍、空手奪槍等少林武功外，今次仲首次有繩鏢表演，同埋10歲嘅少林弟子表演童子功。表演童子功嘅劉向洲同八方講，童子功係高難度嘅少林拳術之一，好似童子拜觀音、朝天蹬等要講求基本功，適合兒童練習，亦係少林寺嘅秘傳功法，因為要做到筋骨柔韌，猶如童身，所以有童子功呢個名。
而昂坪360市務總管陳衛良話，換纜重開後會加強海外宣傳，而成個10月會有連串少林武術表演同活動，因為中國功夫好受外國遊客歡迎，希望平均每日吸引到5,200名遊客。