NBA新一季波衫噚日開售，《蘋果》都搵嚟甲一球員「堯帝」黃律堯（圖）試試新衫，率先體驗。
南青嘅黃律堯試齊六件「一剔」Swingman款之後，話感覺新款剪裁貼身，打起波嚟都唔會影響動作同美感，佢仲話新波衫cutting修身，運動員唔鍾意着鬆泡泡嘅衫，盡量緊身會比較舒服，因為太鬆動作唔係咁靚，而且比賽亦可保暖。另外就算着出街都修身，着起個figure都靚。
NBA新球季喺10月中會開「咧」，阿堯就話最期待雷霆三劍合璧，不過西岸爭崩頭，照計冠軍都會落喺騎士手上嘞。
NBA近年積極帶嚟新鮮感，除咗全新波衫，同埋來季會喺波衫上落廣告，亦有其他新方向。NBA賽會方面啱啱喺周四結束一連兩日嘅董事局會議，投票通過對選秀會抽波仔嘅改革，30支球隊代表有28票贊成下，將禁止球隊透過喺常規賽擺爛，即係特登輸波，而增加喺選秀會得到較高順位揀新人嘅機會，新制會喺2019年實施。
另外，由再下一季，即係2018/19球季起，各隊薪酬上限將會突破一億美元大關。
