新一屆政府問責官員入面，仲有兩個政治助理人選未公佈，包括盛傳會做食物及衞生局政治助理嘅《城市論壇》主持蘇敬恆。
因同情傘運過唔到關
不過噚日有消息話，食衞局政助人選仲未定，仲話蘇敬恆已不在候選名單內，唔少政界中人認為蘇係俾建制派同西環篤死，亦反映𠵱家北京對特區政府用人條件越鍊越緊，政府牙力大不如前。
有政界中人話，之前傳過建制派不滿蘇敬恆主持《城市論壇》時候，成日「偏幫」泛民嘉賓，所以向西環同北京打小報告，佢亦聽聞有極左人士向北京投訴，指蘇敬恆同情傘運，政治立場有問題，所以蘇敬恆過唔到關，佢完全唔意外，但同時睇到北京把口就講要團結社會不同人士，但實際連同情、理解傘運中間人物都容不下，習近平所謂要促進香港社會團結和諧，根本信唔過。