張曉明離開香港中聯辦，返回北京做港澳辦主任，中聯辦主任由澳門中聯辦主任王志民接班。特首林鄭月娥對記者講，中央對港政策一如既往，有領導官員被形容走強硬路線，或有鷹派，鴿派之分，都是坊間的標籤。
林鄭即係講乜呢？A君剛自北京回港，在餐廳碰到佢，問佢在北京有冇收風。A君話：「有少少啦，講開生意，自然講講吓離不開中央對港政策，啲風未必次次準，但聽聽埋埋，總會知道一啲大勢所趨，我地做生意冇理由逆勢而行嘅啫。」
咁現在走甚麼方向呢？A君話：「林鄭冇講錯，北京冇鷹派、鴿派、強硬派、溫和派之分，全部人都係習派，統一口徑，不得妄議，要緊跟習路線辦事，習路線就是強硬路線，就是鷹派，你明白未？林鄭講得幾白㗎嘞！」
原來如此，張曉明回京上任後見香港記者，講得幾強硬、清楚啫，港獨講吓都唔得，要嚴打，至於為何1997回歸後出生嘅青年人，現在嘅18、19歲大學生思想反共，興起港獨之念，港澳辦有冇研究其成因呀？「港英奴化教育」培育咗好多親共大學生，曾經雄霸學生會，特區教育就培育咗好多反共大學生，現在雄霸學生會，港澳辦負責港澳政策，對此所謂港獨之風，係唔係要負起一啲責任呢？
張曉明54歲，歷任港澳辦主任最年輕，而且資歷最淺嘅就係佢，能上高位，必有後台，後台係邊位，我地唔知。試睇番資料，第一位港澳辦主任廖承志（1978-83）係革命元老，第二任姬鵬飛，做過外交部長，第三任魯平，負責特區回歸談判、起草基本法，第四任廖暉係廖承志之子，第五任王光亞，做過外交部副部長，係革命元老、十大元帥之一嘅陳毅女婿，人人有堅實背景資歷，同佢地比較，張曉明有何過人之處？A君話：「你點知得咁多吖，後台就是後台，駛乜俾你睇得見，或者後台就係習主席呢！我就信佢係習路綫之忠實執行人，夠忠誠，已經係上佳條件。」表面上，中聯辦及港澳辦同屬正部級，但港澳辦似乎係上級領導機關，點都高出中聯辦半籌。論做官實惠，當然係駐港中聯辦好玩好多，在香港每星期幾多豪門應酬，議員拜訪，到處受逢迎呀，寫四隻字就可拍賣到二千萬元俾民建聯㗎嘞。到北京方知官小，冇港澳人士拜會嘅話，港澳辦只是清水衙門，政策智庫模樣而已。