成個老襯、從此被困！公務員事務局前局長張雲正（圖）被譽為鑽石王老五，終於封盤同80後女友拉埋天窗，帖都派埋啦！
自今年7.1開始退休前休假嘅張雲正早喺佢正式退休前，官場已經傳佢正籌備同係GIS做新聞主任嘅女友Florence呂卓穎拉埋天窗，到日前八方收到朋友傳來佢兩個喜帖，張雲正將會喺下個月22號，迎娶Florence，至於擺酒地點就犀利喇，係尖沙嘴半島酒店。
張雲正素來對感情事低調，相信同女友都喺政府做有關，可見佢相當保護女友。而奶媽特首林鄭月娥上場，張雲正選擇離開，有傳係因張雲正想專心、有多啲時間照顧媽媽，夠晒孝順，唔單止咁，有指佢出入不時都只係坐巴士，唔離地得嚟夠慳家，難怪被封為鑽石王老五。八方都祝一對新人百年好合、永結同心！