英國木球運動員史托基斯（Ben Stokes），本來前途無可限量，將會擔任英國木球隊副隊長，但依家可能前途盡毀。英國《太陽報》喺周三放出一段喺當地周一凌晨拍攝嘅片段，影到史托基斯喺街頭打人，仲要一個打兩個，至手出咗15拳。
現年26歲嘅史托基斯投球同擊球能力都好出色，係木球隊陣中嘅全能手（all-rounder），啱啱入選咗灰燼盃（The Ashes series），即係英國對澳洲呢個傳統賽事嘅大軍名單，但片段曝光之後，史托基斯好可能會被逐出隊。
片段地點係英國布里斯托，史托基斯當時相信係同幾個朋友一齊，喺街頭同另外兩個人先有口角，再向對方施襲。史托基斯一個打兩個似乎都應付到有餘，兩個人都冇乜還手之力捱打，事後佢被警方以涉嫌傷害他人身體罪名被捕，暫時仲未被起訴放番出嚟，唔排除會有手尾。