連勝21場嘅「神奇小子」拳手曹星如（Rex），10月7號將迎接第22場拳戰，世界冠軍寶座衞冕在望，但呢個時候，一條Rex比賽片流出：Rex左一拳右一拳，睇到觀眾熱血沸騰，但對手突然出手，Rex被打到瞓低！裁判不斷倒數，10，9，8，7……
楊文蔚演繹試跳失敗
睇住個冠軍寶座一步一步離開自己，Rex眼前閃過一幕幕運動員受挫嘅畫面：守門員奮力撲救望住個波射入、籃球員上籃時被對手封蓋、跑手中途跌倒，仲有跳高女神楊文蔚試跳失敗……fans唔使心痛，因為Rex同片中嘅運動員一樣並冇氣餒，齊齊克服挫敗企番起身……咁結果係點？就冇人知喇，因為呢套只係Rex同楊文蔚一齊拍宣揚運動精神嘅宣傳片，但現實上Rex又點會冇經歷過失敗，「其實我覺得，贏輸唔到自己去諗，上場先知平時訓練成果有冇發揮到水準」。
Rex覺得失敗只係一個經歷，只要仲有一絲勝利希望，都唔好放棄，「因為你對自己有要求嘅話，好自然會改正錯誤繼續做好件事」，佢勸大家失敗唔會令你失去一切，「一定要經過好多次嘅失敗去吸取經驗，最後先會有一定成果」。
影片由荷李活著名導演Michael Mann執導，係運動品牌少有地以香港運動員作主導拍攝嘅Just Do It系列影片，星如話香港運動員以前冇人關注，到𠵱家得到眾多支持，得來不易。佢喺影片最終憑意志企番起身，現實中面對嚟緊第22場比賽，佢就話目前訓練情況順利，身上的傷患亦大致康復，而且抱住呢個信念：「贏唔贏無人知，搏到盡我話事。」
李八方