立法會下月中復會，泛民同建制派噚日開會，傾吓嚟緊事務委員會嘅主席同副主席嘅分工，代表民主派同建制派講數嘅資訊科技界立法會議員莫乃光話，會上建制派提出沿用去年嘅做法，即係18個立法會事務委員會中，民主派可以喺6個委員會做主席，並喺十數個委員會中擔任副主席，不過一啲被視為敏感嘅事務委員會，好似政制事務委員會咁，正副主席一律都要由建制派擔任。內務委員會副主席可以繼續由泛民擔任。
莫乃光話，呢個做法其實唔符合泛民希望委員會主席由民主派、建制派各佔一半原則，但由於建制派始終在議會佔多數，若泛民不同意，建制派大可全面封殺，建制派又同泛民講，其實泛民被DQ咗6個議席，建制派願意奉行去年的安排，冇趁機擴大版圖，算係咁㗎喇：「佢哋話冇趁你（民主派）病，攞你命。」莫乃光話，佢會先向泛民報告會議進展，預料下周與建制派再討論。