唐英年出山做西九主席，重掌呢個佢離開咗6年嘅西九管理局，外界都想睇睇佢有乜新搞作，佢接受《蘋果》專訪，除咗講佢心目中嘅西九大計外，亦冇唔記得中央要求搞好年輕人工作，想喺西九搞搞幫助年青人創業新意思，但八方估唔到佢同薯片叔叔曾俊華一樣，鍾情於搞美食車。
唐唐向來喜歡美食紅酒係人都知，但佢喺訪問入面都唔贊成喺西九整條美食街咁商業化，反而建議不如喺西九打造十幾廿架美食車，再平租甚至免租畀年輕人經營，既可以鼓勵年輕人發揮創意，亦可創造就業，可謂一舉兩得！唐唐仲話西九其實係一個好重要嘅平台，唔只係一個文化區咁簡單，仲可以對香港經濟發展、就業機會同提升社會生活素質有貢獻。