特首林鄭月娥噚日一日之內跑幾場活動，除咗一早去女性企業董事基金會活動，大談香港女性地位，仲大爆自己當日好努力游說女性做問責官員，可惜唔成功，而林鄭之後仲喺禮賓府見埋接替小明嘅新任中聯辦主任王志民。
林鄭噚日喺女性企業董事基金會活動演講，話當選後曾講過，希望可以邀請多啲女性加入問責班子。
結果大家都知道啦，一眾司局長之中，只有一位女性，佢話原來曾經試過說服部份女士出任問責官員，但係最終游說唔到。
主持人問佢，點解唔試吓立法，規定吓商界嘅公司董事局一定要有女人，但林鄭話，佢唔想動不動就立法，始終呢啲嘢都係靠教育、宣傳會最好。佢話政府嘅諮詢委員會中，有一個委任女性擔任成員嘅指標，指標由以往10%，增加至35%，所以商界都可以仿效政府。
王志民話盼年輕人北上
林鄭除咗去公開活動，傘運三周年之日，亦喺禮賓府同王志民見面，林鄭同王志民識咗好多年，多謝王志民過去多年為香港青年工作嘅支持，期望中聯辦為香港青年人提供更多去內地發展機會，而王志民都係講番啲老生常談，話中聯辦將繼續貫徹一國兩制方針同《基本法》，支持林鄭依法施政。