噚日係傘運3周年，一直喺反佔中同撐警活動中出咗唔少力嘅正義聯盟創黨主席李偲嫣，噚日晏晝冇出席公開活動，去咗勞資審裁處，為自己追兩家網媒公司欠薪同墊支費單案做結案陳詞。偲嫣喺庭上講到佢追討緊嗰15.8萬蚊對佢嚟講好重要，仲話自己係對方條「𡃁」，係24小時on call嘅工作奴隸，講講下幾乎喊埋出嚟，聲都變埋，真係聞者傷心矣！
堅稱自己係僱員唔係股東嘅偲嫣又話，自從佢打工之後，一班六、七十歲退晒休冇事做嘅大叔大嬸就向佢抱怨，以為佢淨係顧住打工，驚佢唔再出嚟帶住佢哋搞課外活動（示威），搞到佢哋好悶咁話，但係偲嫣已同班哥哥姐姐講咗，話佢有晒計劃㗎啦。審裁官聽到呢度就話，同單案冇關嘅嘢唔使講。大家估吓偲嫣口中個計劃係乜呢？