皇家馬德里喺今季西甲表現唔穩定，但喺歐聯就好對辦，周二分組賽H組賽事作客多蒙特，亦係基斯坦奴朗拿度（C朗）第150次喺歐戰上陣嘅比賽，結果佢梅開二度，助皇馬以3:1贏波，克服「恐多症」。皇馬喺歐戰作客德國球隊一向麻麻，近六次喺歐聯造訪多蒙特更加只得三和三負未贏過。今場波除咗係C朗第150場歐戰，亦係佢第400次代表皇馬上陣；未開紀錄前沙治奧拉莫斯疑似喺禁區犯手球，不過冇被吹罰。皇馬喺18分鐘由加里夫巴利先開紀錄，易邊後到C朗發威，50分鐘接應巴利橫傳得手，之後多蒙特由奧巴美揚破蛋，但到79分鐘C朗接應莫迪歷直線大力勁射成3:1奠勝。上陣400場入412球，C朗賽後話：「到今時今日外界竟然仲有人質疑我嘅能力，真係令我覺得十分驚訝。數據就喺晒度，冇需要再用入球去證明任何嘢。」皇馬喺H組兩戰全勝，同熱刺叮噹馬頭連入波失波數字都一樣，跟住兩輪分組賽兩隊正面交鋒，肯定好睇。