10月又係外遊旺季，康泰旅行社董事及行政總裁黃進達話，旅遊熱點泰國開始少雨及冇咁熱。
不過，如果10月尾去泰國就要留意，因為舊年10月駕崩嘅泰王蒲眉蓬，喪禮會喺10月25日至29日舉行，其間旅客最好着素色衫及注意言行舉止，部份景點例如大皇宮和玉佛寺都會暫停開放。
康泰曼谷旅行團嗰幾日都會調動行程，唔去部份景點，或轉去曼谷周邊新景點或芭堤雅。
尤其10月26日進行嘅火葬，相信有多國元首領袖出席，泰國人亦會去觀禮，市面會有交通管制。不過，根據去年泰王駕崩時嘅情況睇，官方儀式對旅客影響應該有限。
黃進達又話，今年10.1、中秋假期好相近，令整體報團人數都多咗，而部份聖誕團都已經開始有人報名，農曆年巴西嘉年華團更已成團，顯示香港人係幾咁鍾意外遊，旅行社更加要諗新景點，包括可代替九寨溝嘅四川稻城亞丁及東歐國家等。