利物浦喺今季要兼顧歐聯，領隊高路普喺英超同歐聯兩條戰線玩門將輪換，由卡利奧斯喺歐聯賽事擔正，點知喺周二歐聯第二輪分組賽就出事，E組賽事作客出戰莫斯科斯巴達，卡利奧斯面對對手罰球反應太慢先失波，紅軍最終只能夠以1:1逼和斯巴達，連續兩場分組賽和波失分。
利物浦喺上周六英超作客險勝李斯特城，點知今場又踢唔出水準。球隊後防問題多多，唔係中堅出事就係門將犯錯，首輪歐聯分組賽對西維爾，洛夫雲門前大漏累球隊失波；到對李城場波門將米洛列特出迎輸12碼，好在自己孭鑊自己補救番；到今場波又到卡利奧斯甩轆，防線球員輪住犯錯。紅軍最近連續六場比賽都有失波，已經失咗13球。
古天奴救駕終和1:1
紅軍五人人牆，角度並唔刁鑽，不過卡利奧斯橫移速度太慢，最後飛盡都撲唔到個波，責無旁貸。紅軍八分鐘後扳平，文尼禁區左路傳予入楔嘅古天奴，後者近門射入，可惜冇辦法為紅軍全取三分，最終比數都係1:1，小組兩戰全和。紅軍守唔掂，進攻一樣有隱憂，今場精銳盡出都只入一球，紅軍近六場波只係入得七球，但呢六場加埋嘅射門多達121次，顯示把握力相當唔掂。
高路普：門將總有出錯時
對於卡利奧斯嘅失波，利物浦領隊高路普賽後認為古天奴係先搶到波，本身呢個罰球其實唔應該存在，而對手喺罰球嘅處理亦做得唔錯，失波無話可說：「今場波己隊表現唔穩定，有時踢得唔錯，有時就唔係，冇好好去把握機會。我哋爭啲運氣，門將喺今場比賽有幾次精采撲救，但亦有時候做出錯誤嘅決定。球隊的確應該要贏得首兩場分組賽，但結果並唔係咁，我哋需要去承擔責任。」