相對上一任美國駐港總領事夏千福，現任嘅唐偉康落區「視察民情」似乎冇咁密，不過唐偉康日前喺美國駐港總領事館fb公佈，佢將會搞暢遊香港行動，睇個勢佢想去晒全港18區。
而唐偉康預告第一站係元朗，fb管理員仲問網民，元朗有乜地方好去，搞到成班網民好熱心咁做唐偉康嘅盲公竹。
原本個po係話唐偉康第一站會去元朗，叫網民估吓佢會去元朗邊啲地方，原本有網民叫佢去買老婆餅，點知fb小編答網民，問除咗食仲有乜地方可以去，咁樣一問即刻引嚟熱心網民做網上導遊，推薦元朗好去處。
有網民建議佢去南生圍郊遊，亦有人建議佢去流浮山買蠔豉，當然唔少得建議佢去試吓元朗美食名店，但亦有口痕友玩嘢，叫唐偉康一場入到元朗，記得去睇吓元朗著名嘅「鄉下佬」同「何君堯」喎。