八方噚日講過教育局長楊潤雄拜訪民建聯嘅點滴，估唔到楊潤雄前日除咗見民建聯外，即晚亦走咗去教協見教協會長馮偉華及一眾教協理事。莫非楊潤雄想顯示自己對民主派、建制派一視同仁？
教協噚日喺fb發文，話楊潤雄前晚去咗教協總辦事處茶敍兩個鐘，即係同佢見民建聯係同一日！馮偉華同八方講，暑假見楊潤雄嗰陣都提過想改善吓溝通，估唔到楊潤雄亦主動提出拜訪教協。兩個鐘時間，大家傾嘅話題離不開國教、幼師薪級表、學童壓力等等。
馮仲話楊潤雄態度比吳克儉好，起碼呢次見面佢覺得楊了解多咗教協嘅原則，大家距離窄咗。傾到最後，馮偉華仲送咗由陸鴻基教授所寫嘅《坐看雲起時—一本香港人的教協史》畀楊潤雄，希望楊明白教協唔單止係工會，亦係一個專業團體、社會團體。