黃興桂話齋：「一個好嘅龍門，可以將球隊由輸變和、由和變贏。」計我話，射手遠比龍門值錢嘅地方，正正就係可以幫隊波直接由輸變贏！
球迷最熟悉嘅英超嚟講，豪門之中除咗利物浦之外，都有一個正宗射手壓陣，而且今季仲個個都大把貨賣，就算講到李斯特城爆冷捧盃嗰屆，占美華迪季初連續11場有波入嗰段都係關鍵。
意甲前列球隊都係靠保羅戴巴拿（後）、恩莫比利、梅頓斯、迪斯高係咁入波，當中祖記嘅戴巴拿今季直情脫胎換骨，罰球、遠射都有明顯進步，由上兩季喺祖記加埋入30球，到今季踢咗六輪已經有10球，仲兩次大演帽子戲法，直情好似美斯同C朗咁嘅頻率。教練艾基利都寧願將希古恩放落後備，改用輔助性強得多嘅文迪蘇傑打中鋒。
講到球迷較有情意結嘅米蘭雙雄，成敗好大程度都係取決於個射手。A米雖然買咗前鋒卡連歷同安達施華，不過29歲嘅卡連歷以往喺意甲一季都係最多入唔算多產嘅15球，後者直情就得唔到教練蒙迪拿信任，寧願用19歲未擔到大旗嘅青訓柏德列古度尼。
反而國米就算上兩季陷低潮，莫路伊卡迪加埋都入40球，到今年走出低谷，佢嘅入波頻率去到一場一球，上個月國米作客反勝羅馬3:1嗰場，伊卡迪將僅有兩次機會轉化做入球，就係優質射手嘅典範。
文：飛鴻