中西區山頂選區嘅補選，今次睇頭十足，自由黨諗住派出前藝人張新悅老公楊哲安出戰，力保該黨嘅橋頭堡，同樣有意挑戰嘅新民黨，盛傳葉劉諗住親身上陣，噚日佢出席一個活動時就話，被問到對手楊哲安有咩睇法，佢話，自己住咗喺山頂20年，唯一物業都係喺山頂，唔知佢係咪暗寸本身住喺薄扶林、仲未上山嘅楊哲安呢？
田北俊︰我同你玩你就大鑊
山頂區係富貴區，以前公民黨派出知名度甚高嘅陳淑莊，自由黨之後派人搶番個位，都要派出住喺西九龍豪宅嘅銀行高層陳浩濂，今次自由黨諗住派兩年前喺薄扶林選區敗陣、家住薄扶林嘅楊哲安出戰。
一直都想喺山頂插旗嘅新民黨，主席葉劉淑儀就諗住自己出馬。噚日佢出席活動後，被問到點睇對手可能係楊哲安，葉太話交由選民決定，但佢好了解山頂區：「我係山頂居民，我住咗（山頂）20年，我唯一嘅物業都係放喺山頂。」仲未上山嘅楊哲安，唔知有咩睇法？
自由黨榮譽主席田北俊早前喺facebook揶揄葉劉，話「我落來同你玩你就大鑊」，葉劉被問到會否接受挑戰，佢就話最終要等黨決定：「田北俊先生都係山頂居民啦，各有各優勝」。聽聞民主派想派出嘅人選都係住喺山頂，如果加埋田少，三位山頂街坊爭奪做居民代表，真係要買定花生睇戲。外界話葉太今次欲染指山頂補選，係想為未來出戰超級區議會議席鋪路，港島直選之位就交畀該黨南區區議員陳家珮，葉太話選到至算啦！又話自己想不斷培養新人。
李八方