中秋節快到，唔知大家會點慶祝呢？新民黨容海恩Eunice噚日找數，直播自己整冰皮月餅實況（圖）。第一次整月餅嘅Eunice手法唔係話好純熟，但勝在誠意搭夠。八方問過Eunice，原來冰皮做法並唔係話十分之難，只係將啲材料撈埋就得，包括冰皮粉、芒果香油、芝麻沙沙餡、菜油、太白粉等；餡料方面，佢就用上芝麻，貪冇咁甜吖嘛。
Eunice話細個嘅時候鍾意食雙黃蓮蓉月，不過佢專揀晒啲蛋黃嚟食，大個咗想健康啲就食啲冇咁甜嘅，好似冰皮月餅、五仁月餅等。中秋節除咗食月餅外，另一個活動梗係玩燈籠啦！以前Eunice都試過用玻璃紙自製楊桃燈籠。其實月餅、燈籠都唔係最重要，人先至係，不過Eunice話今年陪佢過中秋嘅係網友，因為早約好咗喎。