考唔到AO、未獲相中做副局政助唔緊要，想加入政府仲有好多途徑嘅，好似近排環境局以高達月薪5.3萬聘請政務經理，又係大家可以加入林鄭政府、服侍環境局局長黃錦星嘅最佳機會。不過招聘廣告話，申請人最少要有10年與行政有關嘅全職工作經驗，加上仲要會考英文課程乙有個C，所以有一定門檻，唔係人人皆可申請。
不過，工作性質亦應該唔係人人啱。環境局喺招聘廣告中話，呢份工主要係協助管理、推廣和檢討《戶外燈光約章》，為《推廣戶外燈光約章工作小組》提供文書支援，協助統籌、聯繫與戶外燈光相關嘅工作，如果大家連呢份戶外燈光約章係乜嘢都唔知，可能真係要諗諗自己係咪適合應徵。講明先，呢份工唔係公務員，想做公務員嘅，可能都係要考番AO、EO。