上輪英超Big 6球隊全部贏晒，淨係數各隊陣中嘅當家射手入幾多波都數到手軟。盧卡古、阿古路、艾華路莫拉達、哈利卡尼（前）、拿卡錫迪同埋穆罕默德沙拿全部有波入，其中卡尼最誇張，八月冇波入，一到九月就大爆發，啱啱喺歐聯大演帽子戲法，今個月國家隊加埋熱刺一共踢咗七場波，已經入咗11球，仲要入親都至少起孖。
卡尼喺八月踢咗三場英超零入球，到九月先代表英格蘭國家隊出戰世盃外，喺馬耳他身上梅開二度，返去球會報到就入球停不了，近五場為熱刺上陣比賽，三次梅開二度，一次帽子戲法，咁嘅入球率絕對係美斯C朗級數，卡尼要成為美斯C朗級嘅球壇巨星，仲爭幾遠？
卡尼身體質素出眾，入波瓣數多，頭頂腳踢都好掂，絕對有條件更進一步躋身巨星之列。美斯家陣都30歲，C朗亦都就嚟33歲，都係時候要有人接班。以卡尼個人能力而言，確係有條件成為超級巨星，不過冇英超同歐聯冠軍襯托點都係爭啲，阻住佢嘅可能係佢效力球會熱刺，以呢支球隊目前實力，要贏呢兩項冠軍難度唔細。難得係卡尼喺周二歐聯賽前，仍然強調會效忠母會，希望可以喺熱刺贏到英超同歐聯冠軍。如果卡尼可以帶領熱刺成功衝擊雙冠，球王之名就貨真價實。
卡尼喺今個月仲有一場波踢，周六英超早場熱刺作客哈特斯菲爾德，希望佢有一個最完美嘅九月。
文：何西