歡樂嘅時光真係過得特別快，話咁快立法會暑假就嚟結束，下個月11號奶媽特首林鄭月娥去立法會宣佈第一份施政報告，就係立會議員全面正式復工嘅日子。不過呢一日之前立會好似人哋拍戲咁，開鏡前要搞番場大龍鳳儀式。
立會噚日發通告畀議員，話下月6號中午12點，主席梁君彥（圖）會喺立法會宴會廳主持切燒豬，作為標誌新一個立會會期嘅開始，而傳媒亦會獲邀去影相。其實立會都唔係第一次切燒豬嘅，舊年上屆立法會會期尾，又係以切燒豬嚟告別即將卸任嘅議員。其實切燒豬呢啲都係旨在攞個意頭，重點都係議會係咪代表到人民發聲，之不過𠵱家嘅議會就真係好難講喇。