美國時間禮拜日，係NBA列強嘅傳媒日，最矚目梗係雷霆新三巨頭啦！安東尼（Carmelo Anthony）由紐約人轉投雷霆，夥拍韋斯卜克（Russell Westbrook）同埋保羅佐治（Paul George）勢要衝擊總冠軍。Melo周一話，能夠同韋少、PG並肩作戰，係佢願意放棄交易否決權嘅主因。Melo話：「當我見到韋少對呢個城市、呢支球隊嘅忠誠，加埋佢喺球場上嘅表現，我就想成為呢支球隊嘅一部份。」
唔知係咪興奮得滯，Melo同韋少喺傳媒日大放笑彈。事關有傳媒問Melo對於今季可能要轉打四號位甚至做後備有咩睇法，Melo就反問：「咩我要打後備？」之後就笑到停唔到。有記者問韋少對於自己呢一個月變成潮流標誌有咩睇法時，韋少就好幽默咁話：「呢一個月？你呢一個月去咗邊？」
另外，騎士前鋒勒邦占士（LeBron James）喺傳媒日講到自己同K艾榮（Kyrie Irving）嘅關係，佢話已經準備好將騎士嘅「鑰匙」交到對方手上，唔知點解對方最尾會走人。
