自從食衞局前局長周一嶽離任平機會主席，加盟友邦香港擔任首席醫務官同企業顧問後，較少曝光。不過八方噚日就喺勞資審裁處見到周醫生，事關佢要為平機會俾前總主任束健銘追討約滿酬金一案做證人。別來無恙，周醫生個樣仍然係咁精神飽滿，咦咪住！因乜解究佢要撐住枴杖出場？
作供時手錶響 提示做運動
周醫生庭上作供時，突然傳嚟「嘟嘟」聲，大家你眼望我眼，之後周醫生解開謎團，響聲嚟自佢隻手錶，他解釋係提示佢做「exercise（練習）」咁話。
八方散庭後問候周醫生，原來做過骨科醫生嘅佢，因為成日做劇烈運動，膝頭哥關節勞損嚴重，已經忍咗一排痛，兩個星期前終於做咗手術換咗兩個人工膝關節。佢話其實行平路無問題，不過因為怕嚟到法庭要行斜路同樓梯，所以先帶埋枴杖啫。