時光飛逝，數數手指，今年係港府廢除集體談判權法例20周年，20年前職工盟秘書長李卓人（圖）不滿政府廢法，連續絕食120小時抗議。20年過去，集體談判仍未恢復，職工盟決定下月28日搞絕食30小時，希望喚起公眾對集體談判權嘅關注，阿人係絕食老手，佢已經舉咗手話會參加，佢同八方講由於美國工會邀請佢下月到當地開會，所以絕食當日佢清晨5點先返到香港，但佢一於冇有怕，話30個鐘濕濕碎，點都會撐到底。
職工盟主席吳敏兒（Carol）透露，已有16人報名參加絕食，目標係20人，Carol笑言會逐步食少啲嘢，希望到時能夠適應，佢又提醒大家，職工盟喺絕食行動結束後，會發起重奪集體談判權遊行，由遮打花園遊行至政府總部，呼籲公眾參與。