民建聯呢排搞咗個「與民同心創新局」嘅活動，頻頻約唔同範疇嘅新局長見面，一來講吓對奶媽特首林鄭月娥嘅處女施政報告意見，二來互惠互利，增加吓新局長同民記中人嘅曝光率。噚日就嚟到第3炮教育局局長楊潤雄(圖左)，八方去睇過，點知好可惜，原來見唔到楊潤雄。
個活動係閉門進行，主要係畀民記黨員同局長傾偈，傾完後作為民建聯教育事務發言人嘅張國鈞就同傳媒交代番。張國鈞話呢次會面，佢哋畀咗17項建議楊潤雄，除咗提議推動多元教學、優化DSE、改善舊校舍外，當然唔少得要求將中史獨立成科，同埋加強學生國民身份認同喇！張國鈞仲話，楊潤雄都話明白國教係佢哋關注嘅事，表明會跟進佢哋嘅建議添喎！睇嚟一場硬仗又一觸即發。