前組合SMAP成員香取慎吾、草彅剛和稻垣吾郎告別尊尼事務所後，即同嚴禁藝人肖像喺網上出現嘅舊公司大唱反調，除咗落實合體為網台AbemaTV演出直播節目，仲開設咗個人Twitter。
雖然三子只係開咗帳戶，仲未有留言，但已經有唔少歌迷支持，三個帳戶截至前晚，已有直逼70萬名粉絲，至於AbemaTV直播節目亦反應熱烈，自宣佈預約節目以來，喺短短27小時已經有逾11萬粉絲訂購，預約人數打破AbemaTV紀錄。
三子同時開設咗共同fan club「新地圖」，公開招收會員三天，已經有超過9萬粉絲申請，對於三子今後嘅動向，粉絲實行以行動支持。