蘭桂坊逢佳節必旺場，蘭桂坊協會決定「食住上」，於12月2至3日（周六及周日）舉辦「蘭桂坊冬日市集」，提早進入冬日氣氛，市集集中喺蘭桂坊、德己立街及和安里一帶，將謝絕車輛進入，全面開放作行人專用區。蘭桂坊協會建議活動時間為12月2日下午1時至午夜12時，以及12月3日下午1時至晚上10時，除了活動當日，申請封路時間仲橫跨周五晚至周一凌晨（12月1日晚上7點至12月4日凌晨5點），駕駛人士亦要留意。
項目獲得旅遊發展局支持，將會大玩特玩。大會設有52個攤位，包括賣嘢食同酒精飲品、互動遊戲、零售同照相攤位。為增添節日氣氛，大會喺戶外佈置裝飾，並設有全日的街頭音樂和舞蹈表演，以及零食「大胃王」比賽和泰拳教授，供遊人參加。