今季跑過三次谷草賽事，華籍練馬師頭馬數字佔總數一半以上。至於騎師方面，見習騎師潘明輝成績最好，累積五場頭馬，莫雷拉近兩次谷草都無頭馬見面。
而今季谷草舉行過三次三班1200米賽事，大家有沒有發現都有一個共通點？都是群駒密攏衝過終點，尤其是爭二至五名都特別近，所以絕不能再發生莫雷拉「自動波」事件，畢竟現時有四重彩四連環，不少朋友都會用莫雷拉做膽。
【起尾注】集中分析明晚（27日）兩場三班1200米賽。第六場2號「育馬妙星」，上季由四班贏到上三班，越贏越輕鬆累積三場頭馬，其後提早唞暑。
今季復課大閘只屬一般，但上仗季內初出表現不差，郭能因應排檔只能留守二叠，直路搵位亦不順，但馬匹仍有走勢，大馬開氣後，今仗內檔有望提升名次。
另外，11號「紅星」，上仗同程贏馬補中，而且能跟守較前位置下再爆贏「幸運興隆」，後者再出亦贏馬。「紅星」復課觀感仍渾身是勁，拆組三班1200米呢組對手較弱，望升班馬房打叠再贏。
最後第八場的5號「問鼎高峰」，上仗早段快馬多，全程被逼頂出三叠，但以跟前馬來計，只有「問鼎高峰」蝕位下仲有餘力。始終路程相當之準繩，而且重配郭能操刀，人馬合作4次，取得3冠1季佳績，騎師未開齋鬥志鮮明。
8號「愛樂寶」，較早前已經報名出賽但做後備，上季三歲於三班1200米仍能一放到底，可見馬匹有實力，惟體重未有上升，但今次有黃金1檔配合，潘頓死磅較少仍睇好。