一位外資大機構公關靚女E幾個月前轉工，因為係有獵頭族睇中，人工自然增幅可觀，好快樂咁樣到本地華資上市公司上班去也。一切順利之餘，七月中奉命準備中秋禮物，九月中旬送到大客戶辦公室。靚女E原來以前唔知道中秋要送禮嘅，佢對朋友講：「我做咗公關十年都未試過代公司在中秋節送禮，乜中秋節要送月餅嘅咩？好老套啫！」
朋友聽見為之大笑，中秋送禮，係唔係老套？飲慣洋水如靚女E，在美國讀書，外資機構打工十年，對呢樣嘢可能陌生啲，但此乃華人傳統，華資公司點會慳皮吖。靚女E唯有去撲月餅券、訂生果籃，及一檢查二檢查送禮名單及禮物，唔好搞錯。唔好以為幾簡單呀，去年有公司送俾左丁山一個精美禮品盒，左丁山一打開，內裏竟然係有張字條：「M社長笑納」，於是打電話去問清楚。哦，唔知乜嘢原因，竟然將M社長份禮送咗俾左丁山，真尷尬，身份不同，禮物檔次都唔同㗎嘛！此乃公關低級錯誤，但諗吓佢地送出幾十份禮物，忙中出錯，無謂責怪人咯，但另有一次，公關公司代客戶送餅嚟，左丁山拎返屋企，老婆小心睇過，發覺餅食已經過咗期，立即丟棄，還要左丁山不可向對方老闆投訴，以免有人受老細責罵。
今年收到一張月餅咭，竟然係「順豐」送上門，打開大信封一望，內裏有小信封，小信封內就係月餅咭，不禁奇怪，點解唔用一元七角寄封信就算呢？唔通「順豐」送到上門會收費低過個七銀錢？前幾日碰到一位速遞業中小企老闆，問吓佢，老闆話：「順豐現在犀利過郵局，我地好難同順豐競爭，但月餅咭一張都用順豐送，又係誇張一啲，可能係大公司同佢有大額合約，乜都包送啦！咁搞法，香港郵政容乜易冇晒生意？只靠小市民寄封信，所有大公司、中小企都係用速遞公司咯噃？」郵局又係唔爭氣，在中環見過民主黨議員許智峯掛出橫額：「反對中環中心郵政局結業」（並非原文，大意如此），當然係爭取街坊選票啦。中環中心郵局中午時分有好多人，但朝九晚五準時收工，開舖多年，現在話每年虧本（唉，蝕四百元），故此就快關門大吉，街坊及附近小商戶為之氣結，以後寄封快遞空郵，要行到去郵政總局，要成十分鐘㗎。郵局一旦執笠，又會擴大貧富懸殊，大人物用晒速遞公司，小市民搵唔到郵局寄信，你估對社會穩定有好處咩！