阿仙奴禮拜一晚嘅英超憑前鋒拿卡錫迪上、下半場各入一球，主場2:0擊敗有中場巴利刷新英超上陣紀錄嘅西布朗，全取三分為後日踢歐霸盃壯行色，而且拿卡錫迪都開心講笑，話自己係咪太勁所以成為槍手唯一要去藥檢嘅球員？
兵工廠前鋒阿歷斯山齊士自從轉會窗閂咗後，第一次喺英超正選上陣，但今場就俾佢拍檔拿卡錫迪搶晒fo嘞！上半場八分鐘，西布朗前鋒積洛迪古斯似乎喺禁區入面俾梅斯達菲侵犯，但佢跌低後即刻爬起身完成射門，中柱彈出後先再投訴，咁就太遲嘞！執番身彩嘅槍手，20分鐘有山神主射罰球中楣彈出，不過拿卡錫迪衝前執雞頂入。
入兩粒助槍手剪「布」
阿仙奴易邊後終於拉開比數，67分鐘，西布朗後衞阿倫尼安喺禁區內撞低艾朗藍斯，法國國腳拿卡錫迪操刀12碼得手梅開二度，領兵工廠2:0輕取西布朗，後日歐霸盃去白俄羅斯作客巴迪前，打番支強心針。兵工廠暫時喺六戰得10分排第七，落後榜首嘅曼城六分。
呢場波本來焦點係36歲嘅西布朗中場巴利，因為呢位前英格蘭國腳今場係第633次喺英超上陣，刷新之前同曼聯名宿傑斯共享嘅英超上陣紀錄，獨佔鰲頭。巴利今場獲識做嘅隊友莊尼伊雲斯讓出隊長臂章領軍，而巴利亦都喺今場踢足全場，只可惜冇辦法為球隊搶分。
巴利1998年第一次幫母會阿士東維拉踢英超，轉眼間19年喺維拉、曼城、愛華頓同西布朗踢咗633場英超，所以阿仙奴領隊雲格，亦代表球隊將一件印咗633字樣嘅兵工廠波衫連埋全隊簽名，送畀巴利作個紀念。
踢到633場究竟有幾難？英超史上都係得12人做到500場或以上，超過600場的話更加只有巴利、傑斯同林柏特三個。今季加盟西布朗打正選嘅巴利，仲揚言要踢到40歲，睇嚟呢個紀錄會一直俾佢推高嘞！
