上星期，通常消息靈通嘅老友來短訊：「Sorry Sorry這次我錯了，Jake van der Kamp並無離開南華早報，佢返加拿大放假後，真係繼續在南早寫專欄。」呢樣左丁山都睇到，不過呢位老友通常提供可靠消息，十次有九次中，錯一次冇所謂啦，就此事左丁山謹向譚老總講句鎖你鎖你。
彭定康在九月十八日來港，九月二十一日深夜返回倫敦，照左丁山所知，共出席五次演講會，即FCC午餐、美國商會早餐、香港商會下午講座、港大陸祐堂與學生座談、民主促進會午餐，到太子行書局出席簽名會等等，行程可謂十分緊密，中間還要接受外國記者訪問及與陶傑fb對談，對一位七十二歲長者嚟講，體力要求相當高，事實上，見到肥彭行路已經比較緩慢，同1996年步履如飛嘅狀態，相差甚遠咯，畢竟歲月催人老，人力難以挽回。或者呢一次佢會更感覺到香港人情未了，有不少市民送美食到文華酒店俾佢，蛋撻當然有份啦。
肥彭來港之主要目的，其實係西方出版社推廣新書出版之標準動作，旨在憑作者個人名氣及吸引力，引起讀者對新書之注意，增加銷路。據消息人士講，當初本來安排佢在六月尾來港，「趁墟」吖嘛，七一回歸二十年噃，最後一任港督一定有新聞價值啦。但正因為七一，一啲高人認為太敏感，唔多like，肥彭佢地咁醒目，於是將行程押後至九月中。哎吔，點知有咁啱得咁橋，香港有雙學三子入獄之事，肥彭寫信到FT評論幾句，當然惹人觸目，今次來到就梗係俾記者追問啦，佢亦本住一貫作風，答咗幾句，咁就過癮咯，愛國報紙立即質疑佢「揀正時候」來香港搞事，發動寫手發表文章，大罵肥彭一輪。呢個世界邊度真係有咁多預謀策劃吖，好多時都係隨機應變，煮到嚟就食，以肥彭嘅政治技藝，記者問乜佢就答乜，有人聽唔入耳就冇得好講，但大罵肥彭故意「巧合地」在呢個時候來港指手劃腳，可列入笑話一類！話時話，彭定康呢次出席嘅餐會演講會，人氣鼎盛，到處滿座，但詳細報導嘅報紙就比較少有，似乎有意冷落之，見微知著，可察覺到香港現在傳媒生態，走精面者多，如「蘋果」萎縮，生態好容易合而為一。出版新書，最緊要講銷路，彭定康新書「First Confession」在中環每本賣240元，聽聞銷量甚佳，書商高興，港大嘅辰衝書店優惠學生，本書嘅價錢低好多，唔怕腳程遠嘅話，買書人可到港大入貨！