「雙學三子」俾律政司覆核刑期而被改判坐監，到𠵱家差不多成個月，好多人都關心佢哋喺監獄嘅生活，黃之鋒爸爸黃偉明噚日幫老友束健銘追平機會人工一案出庭作供，咁八方梗問佢之鋒嘅情況，黃偉明話阿仔喺壁屋入面學識打乒乓波，笑笑口話之鋒運動一向都唔掂，因為佢眼呀、手腳唔協調，但竟然係監獄入面學識打乒乓波，黃爸爸都有啲安慰。仲話除咗做運動之外，之鋒都學識咗做家務、摺被呢啲之前唔識做嘅嘢。
周庭接波 或代眾志上陣
至於之鋒心情如何，黃爸爸就話好好，又話之鋒喺入面收到好多市民嘅信件，詳情就唔方便透露喇，因為有啲係涉及之後嘅政治部署嘅，話大家有心喇。黃爸爸都想之鋒申請保釋出嚟等上訴，但八方問之鋒律師，律師就話之鋒仲未入紙申請保釋，因為之鋒仲有條刑事藐視法庭罪孭喺身，要睇吓判成點再決定係咪保釋嘞。
之鋒可能仲有一段時間先出到嚟，但佢入監之前已拜託戰友周庭，喺佢同羅冠聰坐監時候，睇住佢哋一齊創立嘅香港眾志，而眾志𠵱家要處理嘅幾項重要事情，其中一樣幾逼切做決定，就係派乜人參加因羅冠聰被DQ，要喺出年3月舉行嘅港島區立會補選，之前傳過會由周庭去馬、又傳過羅冠聰女友袁嘉蔚係考慮人選，周庭噚日接受電台訪問，佢話眾志傾向派人出戰明年3月立會港島區補選，最快10月有決定，至於佢選唔選？今次周庭答案就比以往有傾向性，佢話唔介意行得更前，又認為議會路線仍然有用，如果咁睇周庭去馬機會又多幾分。
李八方