立法會議員何君堯被揭發原來唔係新加坡、英國同威爾斯執業律師，雖然佢已經快快手將佢律師樓網頁資料，改做「執業律師資格」，但唔代表佢選立會時，自稱喺呢兩度地方嘅執業律師會冇人追究。好似花生友、本身係律師嘅立會議員謝偉俊噚日喺電台就暗寸何君堯，話做得立法會議員呢啲有爭議嘅職位，如果仲係好鍾意做打手，就應該更加小心，唔該睇實自己個後欄有冇着火！佢勸何君堯最好退一步唞啖氣，唔好再為件事爭拗，或者過多兩日就有其他大新聞蓋過呢！
覆核王入稟DQ
其實除咗民主派、民間團體追擊何君堯，分別要求律師會、立法會做嘢，「覆核王」郭卓堅就何君堯涉虛報資歷，噚日向法院提司法覆核，話何違反《選舉（舞弊及非法行為）條例》，要求法庭DQ何君堯，並下令何退還已領議員薪酬。郭卓堅話佢之前已入稟DQ柯創盛、葛珮帆，今次再要DQ何君堯，就係要除三害，又話相信有義務律師代表佢，至於訟費佢話如果畀唔到就會破產。