傳媒每逢遇上IT難題，或查詢業界意見，除咗問立法會資訊科技界代表莫乃光，亦會搵堪稱傳媒之友嘅界內專家、香港資訊科技商會榮譽會長方保僑Francis，但原來Francis大專時唔係讀IT㗎。
Francis細個住喺牛頭角上邨，基層家庭娛樂唔會多，好記得媽媽湊住佢同家姐阿哥細佬喺屋企車衫賺外快。佢中學讀地區名校沙田官立中學，Francis卻話入學時沙官都幾雜，唔知係咪因為當時個校長管教好嚴，令學校成績穩步上揚，當年同屆都有會考8A生。而佢成績則一般，入咗理工學院讀專業文憑課程（公司秘書及行政人員）。咦，公司秘書課程喎，學生係咪陰盛陽衰？「係呀，全班約40人，30幾個係女仔。」咁咪艷福無邊囉？「有拍拖，但冇下文喎。」佢畢業後第二份工做貿易，曾到尼日利亞出差，「想當年都22歲，係人生第一次搭飛機，細過好窮最遠去過汕頭返鄉下咋」。
佢憶述其中一次尼國之旅，「無命咁滯」。話說有日佢要去到當地一間銀行處理賬務，咁啱之前喺銀行附近餐廳食早餐，「突然間聽到銀行傳出爆炸聲，仲要冒煙，事後知道冷氣機爆炸死咗兩個人，如果我早一個鐘去銀行，分分鐘冇命返香港呀」。死過翻生嘅佢，其後發展IT事業，同時都好關心政治。1989年六四時佢讀緊理工，至今毋忘當年電視新聞畫面，每年都盡量抽時間去六四集會，佢都希望港人同樣勿忘初衷。